[不漏國]唔去唔知咁C服 ~ 通宵巴士南下

2010 03 28 ~ DAY2

10:00於酒店吃早餐[房價包早餐]架!!

哩個越式法包比真正的法包好食得多,

係街邊檔買會更加多料,

去不漏係[必食]的!!

吃過早餐,check out 後留下行李,

因為今晚坐夜車南下,

所以有大半日遊走[河內]!!

先往[Sinh Cafe]唔好誤會我又食嘢,

[Cafe]係指旅行社,要去換取車票!!　

出發前已在網上訂票及用信用卡付款,

而取票時記得帶護照及付款個張信用卡,

收車票時除了核對日期/時間外,仲要睇下有無坐位編號!!

你可以要求坐位位置,

大巴分上下床舖,

獨立三排,

而車尾係四個人一排過!!

　

各位記得於網上記下[Sinh Cafe]地址,

河內只有兩間分店,

但係我見周街都有老翻店,

就算正店對面都有流嘢,

仲要靚過正店,各位真係要小心!!!

[Sinh Cafe]網址 ~ http://www.thesinhtourist.vn/

換完車票職員會提你幾點返嚟等車!!

之後便HEA遊河內市,

主要遊[還劍湖]附近!!

當天是星期日,所以有很多人影結婚相!!

至於遊[河內]可於旅遊觀光協會取地圖及攞料!!

位於Cau go street!!

行到咁上下,

係時候HEA 1 HEA,去食雪糕!!　

係自助型式,首先揀軟雪糕,

有成10款味,

每款一圈都得架,

之後揀生果or朱古力粒等等,

最後磅一磅睇下比幾錢!!

我哩杯178g,要39,000[不漏錢]即係US$2!!

並會免費提供蒸餾水及雜誌!!!

再行多陣又係時候開飯!!

唔知點解想食泰國嘢,

尚算可以,

不過杯珍多冰好得囉!!!

大概5點返回酒店攞行李,

再番去旅行社等車,

車程18:00[河內] ~ 08:00[順化],

係旅行社門前買埋晚餐,

就係串燒法包!!

等等下車有一名男子用英文問我地係邊度嚟??

原來佢係廣州人,

即刻轉台用番廣東話,

佢單拖由廣州出發,

坐成十多小時車到達[河內],

之後一路坐車南下玩到[胡志明]市再搭飛機返廣州,好堅!!　

講講下有一輛七人車接我地,

原來要過總店上大巴!!

先將行李放車底然後上車,

全程車有4名職員,3名司機輪班揸車,

另一名服務員負責搬行李/睇實全車人/車上大小事務都係佢做!!

　

上車時司機會派膠袋,唔係嘔吐袋,

而係個個都要除鞋,

比個袋你入起佢!!

連司機都只係着襪!!

好乾淨架佢地,

開車後有人唔小心倒瀉水,

服務員係聽到水聲即刻攞布衝去抺,勁!!

車上有廁所我無去過,

因為十點後我已然進入死瞓狀態,

我諗都應該乾淨!!

坐位下有一個櫃桶仔比你放鞋,

每個位都有一個枕頭及一張毛毯,

晚上都幾凍架要蓋的,不過唔洗驚,

張毯係乾淨架,落車時服務員即刻收哂,

放係下一站[順化嘅sinh cafe]等人收,

店內仲有幾袋洗好嘅毛毯添!!

以我有近5呎8的高度,

確實唔可以申直哂成個人,

可能最後一排會好D!!

半夜車上影的明月!!

　

[不漏國]人好遵守車速,絕不會超速,

而且如果行緊快線,

發覺前面架車慢過自己,

司機會打幾下高燈,

閃到前面架車轉線為止!!

因為同行友人無乜點瞓,全程睇到實,

仲停過幾次埋油站,

落車鬆一鬆食支煙,而轉司機時,

接班個位都會去洗個面,

醒一醒神!!真係好安全!!