[不漏國]唔去唔知咁C服 ~ 一日天堂,一日地獄...What the hell??(下)

2010 04 02

上回講到好唔順利咁到達酒店,

已經成10點鐘,

攰到唔想郁,

一落車就有兩名酒店職員即刻出來幫我地攞行李,

[兩條友好似陀地咁嘅樣]

第一句就話,

[等咗我地好耐],

我即刻"入"佢啦,

[係我地等你地呀,唔好倒轉講]!!!!!

佢即刻[SA哂冧],

繼續CHECK IN,

仲沖杯"甜"茶比我地飲!!

不漏國嘅酒店,

大部份都要KEEP起住客本PASSPORT,

呢間都一樣,

跟住上房,

無電梯,

不過一定有人幫你搬行李!!

一開門 ~~ 乃嘢......

完全貨不對版!!

同佢地個網站講嘅完全唔同,

我今日再試入呢間酒店個網,

已經刪除咗,

不過經代理仲可以BOOK到呢間嘢,

[即係仲未執]!!!

[Democracy Hotel Hanoi]-黑店

睇吓間房. . .

唔知點解影完出嚟,

好似幾OK咁??

不過現場真係好差...

上圖左手面第一張,

相中[最右邊]是大門,

一路向[左邊]都是板間,

[最左邊係個木櫃]就係咁同隔離房分間,

講嘢大聲D都比隔離聽到,

無窗!! [網站話有窗&good view]

真係"頂" ~~~~~

張床好似好舒服,

不過一坐...

D彈簧好鬆,

床腳仲發出[at at 聲],

點瞓呀???????

到浴室,

連企缸都無?? [網站話有浴缸添]

好唔掂,

我地都接受唔到,

唔想住呢間嘢,

但BOOK咗3晚喎,

點算???

當時未食飯諗唔到嘢,

即刻出去搵食,

個晚[河內]受冷峰影響,

又凍[20度],又大風,仲落雨....

但上半天係[峴港],

三十幾度,好大風,唔太熱,仲好好天,

簡直天堂與地獄......

行咗幾間食店,

都準備打烊,

最後食[KFC],

都幾好食,

食飽諗吓今晚點??

決定搵過第二間酒店,

好出發,

就喺'黑店'隔幾間鋪,

有間酒店,

一於入去問吓價,

得一位後生仔當值,

佢好有禮,

英文好流利,

價錢OK,[開價US$25,同黑店一樣]

叫佢開間房比我地睇,

我地好滿意,

跟住我地道明來意,

講哂黑店D嘢比佢聽,

仲請佢幫手,

幫我地取消黑店BOOKING,

跟住轉過嚟,

當我地一講黑店名,

佢就即刻話隔離喎,

表情好為難....

不過我地表現得好可憐,

我仲無瀨到話,

今晚寧願係呢度坐都唔番去瞓!!

佢即刻心軟...

就出門口問朋友借手電打過去黑店,

[佢費事用公司電話比黑店知道]!!

講咗幾耐吓,

不過講[不漏話]唔識聽....

佢幫我地傾掂數,

今晚要照比錢,

但第2&第3晚可以取消!!

佢極力勸我地住一晚咁多,

然後明晚&後晚先轉過嚟,

反正要比錢嘛!!!

[呢位後生好好人]

但我地堅決今晚要轉過嚟,

佢都無我地符,

仲自動減價,

因為今晚只淨番一間細房,

由US$20減至US$15,

而後兩晚有大房,

由US$25減至US$20/晚,

佢太好人喇,

錢跟本唔係問題,

最緊要唔洗住[黑店]!!

最好笑當時有個韓國人在場,

完全知道我地發生咩事,

佢等我地搞掂後,

搵後生仔傾計,

佢住咗係度成三星期了,

一聽見我地有DISCOUNT,

佢[講笑問]後生仔點解唔比DISCOUNT佢??

後生仔話我地係女仔要幫我地嘅,

韓國人話而家男女平等喎!!

後生仔係老實人都唔識得再駁佢,

不過韓國人係堅講笑,

跟本無所謂!!

好喇,

終於搞掂最後3晚住宿,

安落哂!!

不過,

跟住我地要番過去攞行李,

比錢,

走人!!

後生仔千叮萬囑我地,

記得要攞番本PASSPORT,

同埋如果講唔掂數即刻番過嚟先,

搞到我地有D緊張....

驚黑店刁難我地,

如果唔肯幫我地搬行李,

已經玩起我地啦!!

一入黑店,

條友問點解唔住呀??

我心諗[要立即離開,唔好理佢]!!

我話唔住喇,

你幫我地搬番行李落嚟,

同埋比番本PASSPORT我地!!

跟住佢叫人幫我地搬行李,

落到嚟,

好彩佢先比番PASSPORT我,

我即刻袋好,

佢就[發難]喇,

話我地明明BOOK咗3晚,

要比US$75!!

我都唔同佢客氣,

即刻一輪咀鬧番佢,

[我明明BOOK咗車接送,

咁你又唔嚟接??

又唔通知??

我係機場等咗幾耐呀??]

佢O咀,唔識駁,

[我再鬧,

間房完全貨不對版,

你地呃我先,

仲要我錢你!!]

跟住佢無聲出,

我即刻攞已經準備好US$25,

一放低即撇,

佢地兩人即刻追出嚟,

我地跑住走,

友人過咗對面馬路行,

而我過唔切,

有車阻,

我地分開一路向前行,

我經過酒店後生仔望到我,

我打咗個手勢比佢,

[轉頭番嚟]!!

當時全條街都無乜人,

又黑,

我地衝咗入CAFE避一避,

友人走出去[裝]下有無跟嚟,

見到條友左望右望[搵緊我地],

可能想睇吓我地去咗邊間酒店??

之後見到佢行番轉頭無再追嚟!!

我地飲杯嘢,

定一定[驚]先,

友人話我頭先D英文好勁,

鬧到佢無聲出,

其實我好驚架!!!

抖順條氣,

行番去搵後生仔,

佢即問有無事呀??

我地覆述番比佢聽,

佢話我地好醒,

無即刻走入嚟,

識得去CAFE避一避!!

[我心諗,你想話我地無跣你咋]!!

搞到12點幾,

終於可以沖涼瞓覺!!

好唔順利的一天,

最後都無事,

仲幾刺激添!!

繼係[九州差D要瞓街]後,

呢次都可算係代表作喇!!